Day 11
今日返香港啦
總結今次旅程:
咁耐以來第一次咩行程都冇, 試過就算啦 !! 以後唔會, 呢種方式絕對唔適合我同老公
老公話好似咩都冇玩過咁, 去的地方太少啦!!
唔係~~係咩地方都冇去過,
想去日落崖~~~冇去
想去NATURE 食飯~~~冇去
想去從來都冇去過去幻多奇~~~冇去
未出發前明明話要按多幾次摩, 做多2次SPA , 但係~~
老公話失敗咗~錯咗一次, 以後都唔會再發生架啦!!
為咗要修復今次心靈上精神上的缺憾~~~~~
我哋返到香港已高速PLAN咗未來3個行程啦!!!
曼谷5天新探索之旅~香港航空商務客位
2晚: HIP HOTEL BANGKOK(HI STUDIO-室內面積:39平方米)
3晚: CENTARA GRAND AT CENTRAL WORLD HOTEL(WORLD CLBU PREMIUM-室內面積:54平方米)
結婚5週年浪漫布吉之旅(13日12夜)-泰航商務客位
暫定4間酒店
2晚: SAFARI BEACH HOTEL(BEACH WING SUITE)-室內面積(30平方米)
2晚: CENTARA BLUE MARINE RESORT & SPA PHUKET(1 BEDROOM DELUXE POOL VILLA-室內面積:180平方米)
4晚: THE VIJITT RESORT PHUKET(PRIME POOL VILLA-室內面積:178平方米) 5年前在這間酒店行婚禮的
4晚: GRAND WEST SANDS VILLAS PHUKET(LUXURY POOL VILLA 2-BEDROOM-室內面積:180平方米)
曼谷華欣8日7夜迎豬賀新春-泰航商務客位
酒店未定
最近在FACEBOOK的朋友分享出來的
10個好旅伴指標！中咗一半已經算係好旅伴 如果遇到就要好好珍惜～因為真係好難得
大家不妨睇睇自己身邊的朋友中咗幾多項 ?
哈哈哈~~我老公中晒
去旅行除咗行程同景點好重要，同邊個去都幾影響成個旅程開唔開心。不過要遇到個好旅伴，其實並唔容易，因為好多時候發現平日做朋友／情侶／屋企人會無咩問題，但一去旅行就好似唔同晒咁。
如果你旅行嘅旅伴中咗以下指標超過一半，記得好好珍惜佢地，因為真係好難得。
1. 唔會無啦啦黑面
相信唔少人中槍就係呢一點，如果旅伴成日無啦啦黑面，但又唔講咩事，就會搞到成個旅程氣氛好差。其實出嚟旅行，都係想大家玩得開開心心﹐仲可以有個好旅伴同你分享旅程種種點滴，例如靚景、好食嘅美食、難忘嘅經歷等～
2. 願意plan行程／book嘢
其實如果唔係自己一個旅行，大家一齊plan行程，或者分工合作係幾重要～因為每個人想去嘅地方都唔同，而且要排行程順利，唔會兜好多路，又要做交通資料搜集，仲要諗埋住宿，個負荷就會有啲大。
如果你嘅旅伴肯幫手plan下行程、預約各種事項，你會發現成個旅程出錯機會會比較低，而且大家會比較容易滿意！
3. 唔會去前咩都話無所謂、去到就嫌三嫌四
好似上面咁講，有人幫下手plan行程會比較好～但有部份人去前會話「無所謂啦～你決定！」、「我去邊都ok架」，但當去到當地就會發現佢地並非無所謂，反而仲會嫌三嫌四，話呢樣唔好，嗰樣唔好～
當你排完行程，發現佢唔係之前講嘅「無所謂」，而且會嫌三嫌四，就會有啲唔開心。相反如果你有個會睇到你努力嘅旅伴，真係要好好珍惜！
4. 肯準時起身
雖然有唔少人都會遲起身，不過有啲可能係一遲起身係可能到下午一、兩點，叫佢地起身仲要畀人發返脾氣轉頭，同埋梳洗時間比較長，就會變咗本來計劃行程去嘅地方去唔到～
如果旅伴係會準時起身，真心好難得，記得要讚讚佢地（笑）
5. 同你一齊做低能嘢
呢樣都幾重要～通常自己一個旅行唔會做啲低能嘢，旅伴肯同你做埋低能嘢，好似跳啲奇怪舞、拍啲奇怪片等，咁先係青春架嘛～
6. 肯同你周圍去
去旅行一日可能去4個以上嘅景點，旅伴如果行一陣就畀說話你聽話好攰啊。搵地方坐低食完嘢，行一陣再話好攰，而且仲發脾氣，會有少少無癮，相反旅伴會肯同你周圍去，咁就very good！可以去到好多唔同地方，而且又開心！
7. 人肉GPS
去旅行最重要係有個有方向感嘅人帶領大家～如果旅伴好有方向感，做到人肉gps，咁大家就行少好多冤枉路！
8. 影相影得你靚
呢樣嘢真係難掌握，不過如果旅伴係好識同你影相，咁就可以影到好多好值得紀念嘅旅行相！
9. 唔會大部分時間掛住自己撳手機而唔理你
同人一齊去旅行，都係想有人可以同自己分享旅程上嘅靚景、美食同有趣經歷，但當對方成日睇住手機，又唔多講嘢，就會好似同個陌生人去旅行緊，缺少溝通～
如果旅伴可以為你放低下手機，同你一齊enjoy沿途嘅點滴，咁就已經足夠！
10. 下次仲想同佢地去旅行
呢一點係最重要～就係同佢地去完一次之後，都仲有想同佢地再去下一次。就算旅程有開心、有唔開心，如果去完覺得下次都係唔好，咁就已經證明大家唔適合一齊去旅行。
瀏覽次數